सोलापूर दि. 29 : नेहरु युवा केंद्र, महात्मा गांधी ग्लोबल व्हिलेज, बोरामणी आणि युथ फॉर डेव्हलपमेंट, सोलापूर यांच्या संयुक्त विद्यमाने गांधी जयंती निमित्त जिल्हास्तरीय युवा संमेलनाचे आयोजन करण्यात आले आहे. हे संमेलन शिवस्मारक सभागृह, शिंदे चौक, सोलापूर येथे सकाळी 10 ते 1 या वेळेत दिनांक 2 ऑक्टोबर 2016 रोजी संपन्न होणार आहे. युवा संमलेलनातील विकासासाठी युवा या विषयावरील चर्चासत्रात माजी कुलगुरु डॉ. इरेश स्वामी, ज्येष्ठ पत्रकार अमर हबीब,सर्वोदयी गांधीवादी प्रा. नरेश बदनोरे तसेच प्रा. डॉ. उमाकांत चनशेट्टी, प्रा. हिंदुराव गोरे व श्री. जाधव यांचे मार्गदर्शन करणार आहेत.
सकाळी 9 वाजता महात्मा गांधी पुतळा, स्टेशन चौक सोलापूर येथून युवा रॅली निघणार असून ही रॅली डफरीन चौक-पार्क चौक-चार पुतळा-सरस्वती चौक-भागवत सिनेमा या मार्गे शिवस्मारक सभागृह येथे येणार आहे. खेड्यांकडे चला या महात्मा गांधी यांच्या तत्वानुसार विकास ज्योत गावपातळीवर देण्यात येणार असून विकासासाठी युवा या बिदवाक्यानुसार गावपातळीवरील विकास कामात युवकांचा सक्रीय सहभाग वाढविण्यासाठी प्रयत्न केले जाणार आहेत.
जिल्हास्तरीय युवा संमेलनाच्या समारोप समारंभात जिल्हाधिकारी रणजीतकुमार यांच्या हस्ते जिल्ह्यातील निवडक युवा मंडळाना क्रीडा साहित्याचे वाटप करण्यात येणार आहे. तसेच मान्यवरांच्या उपस्थितीत व्यसनमुक्त रुग्णांचा सत्कार करण्यात येणार आहे. या कार्यक्रमास शहर व जिल्ह्यातील जास्तीत जास्त युवकांनी सहभागी व्हावे असे आवाहन संयोजकामार्फत करण्यात आले आहे.
