नागरिकांना वेळेत सेवा देण्यावर भर द्या : नोंदणी महानिरीक्षक कवडे

नागरिकांना वेळेत सेवा देण्यावर

भर द्या : नोंदणी महानिरीक्षक कवडे

हवेली सहदुय्यम निबंधक कार्यालयाचे उदघाटन

पुणे, 6 – नागरिकांना वेळेत आणि अचूक सेवा देण्यावर भर द्या, अशा सूचना नोंदणी महानिरीक्षक अनिल कवडे यांनी आज येथे दिल्या.

सह दुय्यम निबंधक, हवेली क्रमांक दोनच्या कार्यालयाचे आज नूतन वास्तूत स्थलांतर आणि उदघाटन झाले. त्यावेळी श्री. कवडे बोलत होते. यावेळी नोंदणी उपमहानिरीक्षक चिंतामणी भुरकुंडे, पुणे विभागाचे नोंदणी उपमहानिरीक्षक सोनप्पा यमगर, सहजिल्हा निबंधक तथा मुद्रांक जिल्हाधिकारी अनिल पारखे प्रशासकीय अधिकारी बी.के. खांडेकर आदी उपस्थित होते.

दस्त नोंदणीची वाढती संख्या लक्षात घेता बिबवेवाडी येथे प्रशस्त जागेत आणि संगणकीकृत यंत्रणेनेयुक्त असे कार्यालय सुरू करण्यात आले आहे. या कार्यालयातून नागरिकांना कोणत्याही अडचणीशिवाय सेवा मिळावी. हे कार्यालय नोंदणी कार्यालयांचे आदर्श कार्यालय ठरावे, अशी अपेक्षाही श्री. कवडे यांनी व्यक्त केली. यावेळी श्री. कवडे यांनी कार्यालयातील अभिलेख्यांची आणि संगणकीय व्यवस्थेचेही पाहणी केली.

बिबवेवाडी येथील पुष्पा हाईटस इमारतीत पाच हजार चौरस फुटाच्या प्रशस्त जागेत हे कार्यालय स्थलांतरित करण्यात आले आहे. या कार्यालयात आय सरिता प्रणालीच्या माध्यमातून संगणकीकृत नोंदणी करण्याचे कामकाजही सुरू करण्यात आले आहे. कार्यालयात दस्त ठेवण्यासाठी स्वतंत्र अभिलेख कक्ष आहे. या अभिलेख्यांचे संगणकीकरण करण्यात  आले आहे. नागरिकांना कार्यालयात बसण्यासाठी प्रशस्त जागा असून कार्यालयापासून सार्वजनिक वाहतूक व्यवस्थाही उपलब्ध आहेत.

कार्यालयाचा पत्ता असा- सह दुय्यम निबंधक, हवेली क्रमांक दोन, पुष्पा हाईटस, बिबवेवाडी कॉर्नर, पुणे-सातारा रोड, पुणे. दूरध्वनी क्रमांक - 8275090071

----