कास पुष्प पठाराला भेट देणाऱ्या पर्यटकांकडून शुल्क आकारणी

          सातारा, दि. 2 (जिमाका) :कास पुष्प पठाराचा हंगाम 10 ऑगस्टपासून सुरु होणार असून कास पठावर भेट देणा-या पर्यटकांकडून विविध प्रकारचे शुल्क आकारण्यात येणार आहे, अशी माहिती उपवनसंरक्षक अनिल अंजनकर यांनी दिली आहे.

                नैसर्गिक जागतिक वारसा स्थळ: कास पुष्प पठाराचे शाश्वत संवर्धनासाठी करावयाच्या उपाययोजनेसाठी  नुकतीच  बैठक  आयोजित करण्यात आली होती. या बैठकीस पर्यावरण तज्ञ, पर्यावरण संस्था उपस्थित होते. या बैठकीत झालेल्या चर्चेनुसार कास पठारावरील भेट देणा-या पर्यटकांकडून खालीलप्रमाणे विविध प्रकारच्या  शुल्क आकारण्यात येणार आहेत.

अ.क्र.	तपशील	प्रस्तावित शुल्क : शनिवार-रविवार व शासकीय सुट्टीदिवशी	प्रस्तावित शुल्क: इतर दिवशी
1	12 वर्षावरील सर्वांना	रु.100/- प्रति व्यक्ती जास्तीत जास्त 3 तासांसाठी	रु.50/- प्रती व्यक्ती जास्तीत जास्त 3 तासांसाठी
2	ज्येष्ठ नागरिक	प्रवेश शुल्क माफ आहे	प्रवेश शुल्क माफ आहे (वयाचा पुरावा दाखवावा लागेल)
3	पार्किंग चार्जेस दुचाकी वाहने चारचाकी वाहने मिनी बस व मोठी वाहने	रुपये 10 प्रती रुपये 50 प्रती रुपये 100 प्रती वाहन 4 तासांसाठी	रुपये 10 प्रती रुपये 50 प्रती रुपये 100 प्रती वाहन 4 तासांसाठी
4	कॅमेरा शुल्क (एसएलआर)	रुपये 100 प्रती कॅमेरा जास्तीत जास्त 3 तासांसाठी	रुपये 100 प्रती कॅमेरा जास्तीत जास्त 3 तासांसाठी
5	गाईड शुल्क	रुपये 100 प्रती 10 व्यक्तींकरिता 1 तास	रुपये 100 प्रती 10 व्यक्तींकरिता 1 तास

            कास पुष्प पठारावर भेट देणाऱ्या पर्यटकांच्या संख्येवर नियंत्रण ठेवण्यासाठी सकाळी 7 ते सकाळी 10 वाजेपर्यंत 750 पर्यटक, सकाळी 10 ते दुपारी 1 वाजेपर्यंत 750 पर्यटक, दुपारी 1 ते दुपारी 4 वाजेपर्यंत 750 पर्यटक आणि दुपारी 4 ते रात्री 7 वाजेपर्यंत 750 पर्यटक असे एकूण 3 हजार पर्यटकांना दर दिवशी प्रवेश देण्यात येणार आहे.

            प्रवेश शुल्क फक्त वन विभागाच्या www.kas.ind.in या संकेतस्थळावर ऑनलाईन स्वीकारले जाईल. कास पठारावर भेट देणाऱ्या पर्यटकांच्या वाहनांच्या पार्कींगकरिता घाटई फाट्याच्या अलिकडे व कास पठार संपल्यानंतर तलावाच्या अलिकडे गेल्या वर्षी कास गावाने पार्कींगची सोय उपलब्ध केलेल्या ठिकाणी पार्कींग करावे.

            शासकीय सुट्टी तसेच शनिवार व रविवार या दिवशी मोठ्या संख्येने पर्यटक भेट देत असतात त्यांच्या हालचालींवर योग्य नियंत्रण ठेवण्यासाठी स्थानिक निसर्ग प्रेमी संस्था व स्वयंसेवी संस्था तसेच होमगार्ड व एनसीसी यांची मदत घेण्यात येणार आहे. कास पुष्प पठार परिसरामध्ये पर्यटकांना माहितीकरीता विविध ठिकाणी माहिती फलक, नियमांचे फलक लावण्यात येणार असून पठार परिसरामध्ये पर्यटक अस्तित्वात असलेल्या पायवाटांचाच वापर करा.  कास पुष्प पठारावर रात्रीच्या वेळी वर्दळ राहणार नाही यासाठी घाटईफाटा या ठिकाणी तसेच कास तलाव परिसरामध्ये बॅरिकेट लावण्यात येणार आहे, असेही श्री. अंजनकर यांनी कळविले आहे.

00000