Tuesday, April 30, 2019

महाराष्ट्र दिनी विभागीय आयुक्त कार्यालयात विभागीय आयुक्त डॉ. म्हैसेकर यांच्या हस्ते ध्वजारोहण


महाराष्ट्र दिनी विभागीय आयुक्त कार्यालयात
विभागीय आयुक्त डॉ. म्हैसेकर यांच्या हस्ते ध्वजारोहण
पुणे दि 1 : महाराष्ट्र राज्याच्या 59 व्या वर्धापन दिनानिमित्त येथील विभागीय आयुक्त कार्यालयाच्या प्रांगणात विभागीय आयुक्त डॉ. दीपक म्हैसेकर यांच्या हस्ते ध्वजारोहण करण्यात आले.
यावेळी अतिरिक्त आयुक्त सुभाष डुंबरे, उपायुक्त (महसूल) प्रताप जाधव, उपायुक्त (सामान्य प्रशासन) संजयसिंह चव्हाण, उपायुक्त (रोहियो) अजित पवार, उपायुक्त (पुनर्वसन) दीपक नलावडे, उपायुक्त (पुरवठा) निलीमा धायगुडे, उपायुक्त (विकास) चंद्रकांत गुडेगाव, पांडुरंग पाटील यांच्यासह विविध विभागांचे प्रमुख अधिकारी, कर्मचारी, निवृत्त अधिकारी, कर्मचारी उपस्थित होते. 
   ध्वजारोहणानंतर विभागीय आयुक्त डॉ. दीपक म्हैसेकर यांनी पोलीस पथकाची मानवंदना स्विकारली. त्यानंतर त्यांनी ध्वजारोहण समारंभाला उपस्थित असणाऱ्या अधिकारी, कर्मचाऱ्यांची भेट घेऊन त्यांना महाराष्ट्र दिनाच्या शुभेच्छा दिल्या.
*****








Tuesday, February 19, 2019

महायोजना शिबिराच्या माध्यमातून नागरिकांना निश्चित फायदा होईल -मुख्यमंत्री देवेंद्र फडणवीस






महायोजना शिबिराचे उद्घाटन

पुणे,दि.19 -एकाच ठिकाणी सर्व प्रकारच्या योजनांचा लाभ नागरिकांपर्यंत पोहोचावा, यासाठी महायोजनासारखी शिबिरे उपयुक्त ठरतील,असे प्रतिपादन मुख्यमंत्री देवेंद्र फडणवीस यांनी केले.                   
 कोथरूड येथील महेश विद्यालय येथे महायोजना शिबीर 2019 चे उद्घाटन आज मुख्यमंत्री देवेन्द्र फडणवीस यांच्या हस्ते झाले, त्यावेळी ते बोलत होते .  
यावेळी पालकमंत्री गिरीश बापट, सामाजिक न्याय राज्यमंत्री दिलीप कांबळे, ,खासदार अनिल शिरोळे, . प्रा. मेधाताई कुलकर्णी आदी उपस्थित होते.
   ग्रामीण भागामध्ये योजनांची शिबिरे आयोजित केली जातात.  शहरी भागांमध्ये अशा प्रकारच्या शिबिराचे आयोजन करून सर्वसामान्य नागरिकाना लाभ देण्यासाठी मेधाताईंनी कोथरूड भागामध्ये या शिबिराचे आयोजन केले आणि या शिबिराला एवढा मोठा प्रतिसाद मिळतोय,ही आनंदाची बाब असल्याचे सांगून मुख्यमंत्री देवेन्द्र फडणवीस पुढे  म्हणाले, प्रत्येकाला आवश्यक असलेल्या योजनांचा स्टॉल याठिकाणी आहे. समाजातील सर्व घटकांकरिता योजना आहेत. सर्व स्टॉलवर प्रचंड गर्दी पाहायला मिळाली, यावरूनच लोकांना या शिबिराची आवश्यकता होती, मात्र  व्यवस्था नव्हती . आज या शिबिरामुळे ती व्यवस्था उभी राहिली आहे. लाखो लोकांचे कल्याण त्या माध्यमातून होणार असल्याचे त्यांनी सांगितले.
    मुख्यमंत्री श्री.फडणवीस म्हणाले, 2022 पर्यंत प्रत्येकाला घर देण्याचे शासनाचे नियोजन आहे. प्रधानमंत्री उज्वला योजनेच्या माध्यमातून प्रत्येक गरीबाच्या घरात पोहोचला, तर आयुष्यमान भारत योजनेच्या माध्यमातून आरोग्य सेवा मिळाल्या आहेत. पुणे शहरात मोठ्या प्रकल्पाची कामे सुरू आहेत. प्रकल्प मार्गी लावून त्या प्रकल्पाला निधी देण्याचे  काम शासनाने केले आहे. येत्या तीन ते चार वर्षात पुणे शहर सर्वोत्तम शहर असेल. पुण्याचा बदललेला चेहरा येत्या काळात नक्कीच पाहायला मिळेल, असा विश्वास मुख्यमंत्री फडणवीस यांनी यावेळी व्यक्त केला.
   महायोजना शिबिराच्या माध्यमातून ज्या लाभार्थींनी योजनांसाठी अर्ज केला असेल त्यासाठी आलेल्या अडचणीची सोडवणूक करण्यासाठी मुख्यमंत्री कार्यालय आपल्या बरोबर राहील,असेही त्यांनी सांगितले.
प्रास्ताविक करताना . मेधाताई कुलकर्णी म्हणाल्या, सर्वसामान्य नागरिकांसाठी केंद्र राज्य शासनाच्या अनेक कल्याणकारी योजना आहेत. महायोजना शिबिराच्या माध्यमातून विविध योजना एकाच छाताखाली आणण्याचा प्रयत्न असून या शिबिराला मोठा प्रतिसाद मिळत असल्याचे त्यांनी सांगितले.
     महायोजना स्थळी नवीन मतदार नाव नोंदणी,  प्रधानमंत्री आवास योजना, मुख्यमंत्री सहायता निधी, शैक्षणिक शिष्यवृत्ती योजना, संजय गांधी श्रावण बाळ योजना, राजश्री शाहू शिष्यवृत्ती योजना,  नोकरदार महिला वस्तीगृह योजना,   उज्वला योजना, प्रधानमंत्री मातृवंदन योजना, माझी कन्या भाग्यश्री योजना आदी योजनाबाबत माहिती लाभासाठी  स्टॉल लावण्यात आले आहेत. पुणे महानगरपालिकेच्या वतीने महिला बाल कल्याणकारी योजना, दिव्यांग कल्याणकारी योजना, युवा कल्याणकारी योजना, दिनदयाळ अंत्योदय  योजना  या योजनांसंदर्भात सविस्तर माहिती देणारे फलक दर्शनी भागात लावण्यात आले आहेत. योजनांची माहिती लाभाची नोंदणी प्रक्रिया जाणून घेण्यासाठी नागरिकांनी मोठी गर्दी केली आहे. मुख्यमंत्री फडणवीस यांनी महायोजना शिबिरातील स्टॉलची पाहणी करून समाधान व्यक्त केले. यावेळी नागरिक मोठया संख्येने उपस्थित होते.
                                            ०००००