सिव्हील हॉस्पिटलच्या आधुनिकीकरणास भरीव निधी देणार – पालकमंत्री देशमुख

                   सोलापूर दि.13 :- श्री छत्रपती शिवाजी महाराज सर्वोपचार रूग्णालयाच्या सिव्हील हॉस्पिटल आधुनिकीकरणासाठी जिल्हा नियोजन समितीच्या माध्यमातून भरीव निधी देऊ,असे आज पालकमंत्री विजयकुमार देशमुख यांनी सांगितले.

                   पालकमंत्री देशमुख यांच्या हस्ते आज रूग्णालयात रक्तघटक विलीगीकरण यंत्रणेचे लोकार्पण आणि राष्ट्रीय बाल स्वास्थ कार्यक्रमातंर्गत टू डी इको तपासणी  शिबीराचे उद्घाटन झाले. त्यावेळी ते बोलत होते. यावेळी महापौर शोभा बनशेट्टी ,आमदार सिध्दराम म्हेत्रे, मुख्यमंत्री कार्यालयातील विशेष कार्य अधिकारी ओमप्रकाश शेट्ये, अधिष्ठता डॉ. राजाराम पोवार , जिल्हा शल्य चिकित्सक डॉ. मल्लिकार्जुन पट्टणशेट्टी, जिल्हा आरोग्य अधिकारी शीतलकुमार जाधव आदी उपस्थित होते.

                   पालकमंत्री देशमुख म्हणाले , ‘सिव्हील हॉस्पिटल सोलापूरसह इतर चार-पाच जिल्ह्यातील रूग्णांना आधार आहे. सिव्हील हॉस्पिटलमध्ये अनेक रूग्ण येतात. त्यांना चांगली सेवा देता यावी यासाठी गेली दोन वर्षे जिल्हा नियोजन समितीच्या माध्यमातून निधी दिला आहे. यापुढे गेल्या वर्षी पेक्षा जास्त निधी देऊ .या निधीतून सिव्हील हॉस्पिटलच्या परिसरातील रस्ते विकास पण केला जाईल,असे सांगितले’.

                   श्री. ओमप्रकाश शेट्ये यांनी गरीब रुग्णांवर उपचार करण्यासाठी शासन नेहमी तत्पर आहे. गरीबांवर उपचार होण्यासाठी शासकीय रूग्णालये बळकट होण्याची आवश्यकता आहे. त्यासाठी सर्वत्र निधी दिला जात आहे. सोलापूरलाही निधी दिला जाईल.

                   विकृतीशास्त्र विभागचे प्रमुख डॉ. जी. ए. पंडीत यांनी प्रास्ताविक केले. रक्त विलीगीकरण यंत्रणेमुळे रक्तातील विविध घटक स्वतंत्र करता येतात. त्याचा फायदा अनेक रूग्णांना होऊ शकतो. रक्तातील आवश्यक घटक स्वतंत्र करून योग्य मात्रेत प्रत्येक रूग्णाला देता येणे शक्य आहे. त्यामुळे रक्ताच्या एका बाटलीतील घटकांचे विलीगीकरण करून अनेक रूग्णांवर उपचारासाठी वापरणे शक्य आहे.

000000