नागरिकांनी नियमांचे पालन करत सहकार्य करण्याचे आवाहन- उपविभागीय पोलीस अधिकारी डॉ.कवडे

गरीब व गरजूंना जीवनावश्यक वस्तूचे वाटप

        पंढरपूर दि.6- कोरोनाच्या वाढत्या संसर्गाला रोखण्यासाठी  प्रशासकीय यंत्रणा युद्धपातळीवर रुग्णांना तत्परतेने उपचार उपलब्ध होण्यासाठी आणि कोरोनाचा  प्रसार थांबवण्याच्या दृष्टीने सर्व आवश्यक उपाययोजना प्रभावीरीत्या राबवीत असून,  नागरिकांनी संचार बंदीच्या कालावधीत  नियंमांचे पालन करीत सहकार्य करण्याचे आवाहन उपविभागीय पोलीस अधिकारी डॉ.सागर कवडे यांनी केले आहे.

पंढरपूर शहर पोलीस स्टेशन येथे झुआरी सिमेंट कंपनीच्या वतीने आज गरीब व गरजूंना  जीवनावश्यक वस्तूच्या किटचे  वाटप करण्यात आले. यावेळी पंचायत समितीचे उपसभापती प्रशांत देशमुख, गटविकास अधिकारी रविकिरण घोडके , पोलिस निरिक्षक अरुण पवार, झुआरी सिंमेंट  कंपनीचे सहाय्यक व्यवस्थापक हर्षल तरटे,  अजित पवार, अगस्ती देठे, मोहक गांधी उपस्थित होते.

यावेळी उपविभागीय पोलीस अधिकारी डॉ. कवडे म्हणाले,  मागील काही दिवसांपासूण जिल्ह्यासह पंढरपूर तालुक्यात कोरोना रुग्णांची संख्या वाढत आहे. शहरात कोरोना रुग्णांची संख्या आटोक्यात  आणण्यासाठी 7  ते 13 ऑगस्ट 2020 या कालावधीत लॉकडाऊन करण्याची घोषणा केली आहे. हा लॉकडाऊन मध्ये नागरीकांना संचार  करण्यासास बंदी असणार आहे. लॉकडाऊन मुळे अनेक नागरिकांना रोजगार  मिळणार नसल्यामुळे झुआरी सिमेंट कंपनीच्या माध्यमातून शहरातील 300  गरीब व गरजू नागरिकांना जीवनावश्यक वस्तूच्या किटचे  वाटप करण्यात आले. शहरातील संतपेठ, व्यासनारायण झेपडपट्टी, ज्ञानेश्वर नगर, कडबे गल्ली, सुलेमान चाळ आदी भागात किटचे वाटप करण्यात येणार असल्याचे डॉ. कवडे यांनी सांगितले..

            ताप, सर्दी, खोकला व श्वास घेण्यास त्रास आदी कोरोनाची लक्षणे दिसून येणाऱ्या नागरिकांनी आरोग्य तपासणी करुन घ्यावी तसेच कोरोना बाधित रुग्णांच्या संपर्कात येणाऱ्या नागरिकांनी आरोग्य तपासणी करुन घ्यावी. तसेच खाजगी रुग्णालयात उपचारांसाठी महात्मा ज्योतिबा फुले जन आरोग्य योजनेचा लाभ घ्यावा. नियमांचे काटेकोर पालन करीत  लॉकडाऊन कडक पाळून करोनाची साखळी तोडण्यास  नागरिकांनी प्रशासनाच सहकार्य करावे असे आवाहनही डॉ.कवडे यांनी केले आहे.

कोरोना संसर्गाला रोखण्यासाठी  आजाराची लक्षणे असणाऱ्या व करोरोना बाधितांच्या संपर्कात आलेल्या जास्तीत-जास्त  नागरिकांनी रॅपिड अँटीजेन टेस्ट करुन घ्याव्यात असे आवाहन  गटविकास अधिकारी रविकिरण घोडके यांनी केले. यावेळी झुआरी सिंमेंट  कंपनीचे सहाय्यक व्यवस्थापक हर्षल तरटे यांनी तालुक्या गरीब व गरजू नागरिकांना 1 हजार 800 जीवनावश्यक वस्तूंच्या किटचे वाटप करण्यात येणार असल्याचे सांगितले.