पुणे, दि. 11: खडकवासला, चासकमान व पवना प्रकल्प कालवा सल्लागार समितीची बैठक येथील विधान भवनात अन्न व नागरी पुरवठा मंत्री तथा पुणे जिल्ह्याचे पालक मंत्री गिरीश बापट यांच्या अध्यक्षतेखाली संपन्न झाली. बैठकीस खा. सुप्रिया सुळे, आ. अजित पवार, जिल्हा परिषदेचे अध्यक्ष विश्वास देवकाते, आ. दत्तात्रय भरणे, आ. बाळा भेगडे, आ. बापू पाचर्णे, आ. भिमराव तापकीर, आ. सुरेश गोरे, जिल्हाधिकारी सौरभ राव, पिंपरी-चिंचवड महानगरपालिकेचे आयुक्त श्रावण हर्डीकर , पुणे महानगरपालिकेचे आयुक्त कुणाल कुमार, सिंचन विभागाचे अधीक्षक अभियंता चोपडे आदि अधिकारी उपस्थित होते.
प्रारंभी पालकमंत्री गिरीश बापट यांनी जिल्ह्यातील खडकवासला, चासकमान व पवना प्रकल्पातील उपलब्ध असलेल्या पाणीसाठ्याचा आढावा घेतला. शेतकऱ्यांना शेतीसाठी व शहरातील लोकांना पिण्यासाठी लागणाऱ्या पाण्याचे योग्य नियोजन करा अशा सूचना पालकमंत्री बापट यांनी सिंचन विभागाला दिल्या.
खडकवासला प्रकल्पांतर्गत पानशेत, वरसगाव, टेमघर आणि खडकवासला ही धरणे येतात. खडकवासला प्रकल्पांतर्गत सिंचनासाठी 25 हजार हेक्टर क्षेत्र तर अनुज्ञेय पाणीवापर 5.46 द.ल.घ.मी. आहे. जनाई शिरसाई उपसा सिंचन योजना वरवंड व शिर्सुफळ तलाव भरण्यासाठी 0.28 द.ल.घ.मी. , दौंड, इंदापूर नगरपालिकेतील नागरिकांसाठी पिण्याच्या पाण्यासाठी 0.14 द.ल.घ.मी., पुणे महानगरपालिकेसाठी 2.95 द.ल.घ.मी.पाणी आवश्यक असल्याची माहिती बैठकीत देण्यात आली. बैठकीला जलसंपदा विभागाचे अधिकारी उपस्थित होते.
00000
No comments:
Post a Comment