पुणे, दि. 11 : शासनाचे मुखपत्र असलेल्या ‘लोकराज्य’ या मासिकाच्या ‘आपले जिल्हे विकासाची केंद्रे’ या विशेषांकाचे प्रकाशन अन्न व नागरी पुरवठा मंत्री तथा पुणे जिल्ह्याचे पालक मंत्री गिरीश बापट यांच्या हस्ते विधान भवन येथे झाले. यावेळी खा. सुप्रिया सुळे, आ.दत्तात्रय भरणे, जिल्हाधिकारी सौरभ राव, विभागीय माहिती कार्यालयाचे उपसंचालक मोहन राठोड, जिल्हा माहिती अधिकारी राजेंद्र सरग तसेच संग्राम इंगळे व रोहित साबळे उपस्थित होते.
पालकमंत्री श्री. बापट यांनी हा विशेषांक स्पर्धा परीक्षा देणारे उमेदवार, पत्रकार, अभ्यासक, शिक्षक, सर्वसामान्य नागरिक व विद्यार्थ्यांना उपयुक्त ठरेल, असे सांगून शुभेच्छा दिल्या.
सप्टेंबर महिन्यातील या विशेषांकामध्ये पुण्याचे जिल्हाधिकारी सौरभ राव यांनी लिहिलेल्या ‘सुबक आणि सुंदर’ या शीर्षकाचा जिल्ह्यातील विकास कामांवरील आधारीत लेखाचा समावेश आहे.
याशिवाय राज्यातील प्रत्येक जिल्ह्यात राबवण्यात येत असलेल्या, पूर्णत्वास गेलेल्या व नजीकच्या काळात सुरु होणाऱ्या विविध योजना व विकास कामांची माहिती देण्यात आली आहे. या मध्ये पुणे विभागातील सातारा जिल्ह्यात जलयुक्त शिवार अभियानाचे यश, घरकुलासाठी योजना, शेतकरी सन्मान, पुस्तकांचे गाव भिलार, विकास आराखड्याला मंजुरी या योजनांची माहिती देण्यात आली आहे. तसेच पुणे जिल्ह्यातील तीर्थक्षेत्र विकास आराखडा, पुणे महानगर प्रदेश क्षेत्र विकास, विकासासाठी ‘जायका’, प्रभावी जलयुक्त शिवार अभियान, छत्रपती संभाजीराजे आंतरराष्ट्रीय विमानतळा विषयी माहिती देण्यात आली आहे. सोलापूर जिल्ह्यातील रस्ते विकासातून समृध्दी, दळणवळण सेवांचे बळकटीकरण, सर्वांसाठी आरोग्य, उच्च शिक्षणाचा विस्तार, स्वच्छता अभियानाचे नेत्रदीपक यश, तीर्थक्षेत्र विकास आराखडा, उद्योग विकास, आधुनिक तंत्रज्ञानाचा वापर केलेल्या योजनांची माहिती देण्यात आली आहे. कार्यक्रमास संजय गायकवाड, चंद्रकांत खंडागळे यांच्यासह इतर अधिकारी उपस्थित होते.
00000
No comments:
Post a Comment