सोलापूर दि. 22 :- सोलापूर शहर स्मार्ट सिटी होण्यासाठी लोकसहभाग अतिशय महत्वाच्या असून लोकांच्या सक्रीय सहभागामुळेच सोलापूर स्मार्ट सिटीला मूर्त स्वरुप येईल, असे प्रतिपादन सहकार, पणन आणि वस्त्रोद्योग मंत्री सुभाष देशमुख यांनी आज येथे केले.
सोलापूर स्मार्ट सिटी मिशन अंतर्गत स्मार्ट रस्ता करण्याचा कामाचे भूमीपूजन आणि स्मार्ट इन्पुर्मेटीव्ह किऑस्क, ओपन जिम, ई टॉयलेट यांचा लोकर्पण सोहळा आज पार पडला. त्यावेळी कार्यक्रमाच्या अध्यक्षस्थानावरुन मंत्री देशमुख बोलत होते. श्री शिवाजी छत्रपती रंगभवन येथे झालेल्या या कार्यक्रमास पालकमंत्री विजयकुमार देशमुख, महापौर शोभाताई बनशेट्टी, खासदार ॲड शरद बनसोडे, उपमहापौर शशिकला बत्तुल, पोलीस आयुक्त महादेव तांबडे, जिल्हाधिकारी डॉ. राजेंद्र भोसले, महापालिका आयुक्त अविनाश ढाकणे उपस्थित होते.
सहकारमंत्री सुभाष देशमुख म्हणाले, “सोलापूर एकेकाळी वैभवशाली शहर होते. पण येथील कापड उद्योग बंद पडला आणि सोलापूरच्या वैभवाला काहीसे गालबोट लागले. सोलापूर शहरावर सध्या टीका होते. लोक येथून पुणे, मुंबईला स्थलांतरीत झाले. आता सोलापूर स्मार्ट सिटी करुन हे स्थलांतर आपल्याला थांबवायचं आहे. त्याचबरोबर सोलापुरात लोक येतील, गुंतवणूक येईल यासाठी प्रयत्न करायचा आहे. शहराचा चेहरा मोहरा बदलल्यावर हे सारं साध्य होईल असा मला विश्वास आहे”.
सोलापूर शहराला धार्मिक पर्यटन आणि आरोग्य सेवेचे केंद्र बनविण्यासाठी राज्य शासन प्रयत्नशील आहे. माग त्यासाठी सोलापूर - विजापूर, सोलापूर - कोल्हापूर, सोलापूर - गुलबर्गा, सोलापूर - हैदराबाद, सोलापूर - धुळे या महामार्गाचा विकास सुरु आहे. सोलापूरचे इतर शहरांशी दळणवळण सुधारल्यावर आपोआपच विकासाचा वेगही गतिमान होईल, असे श्री. देशमुख म्हणाले.
पालकमंत्री विजयकुमार देशमुख म्हणाले, स्मार्ट सिटी अंतर्गतची कामे सुरू करण्यास काहीसा विलंब झाला. पण ही कामे वेळेअगोदर पुर्ण होतील. या कामासाठी निधीची कमतरता पडू दिली जाणार नाही. स्मार्ट सिटी अंतर्गत कामे होतील पण ती टिकविण्याची जबाबदारी सोलापूरकर नागरिकांची आहे. नागरिकांच्या सहभागामुळे स्मार्ट सिटी कायम स्वच्छ आणि स्मार्ट राहण्यास मदत होणार आहे, असे पालकमंत्री देशमुख म्हणाले.
यावेळी महापौर शोभाताई बनशेट्टी, खासदार ॲड. शरद बनसोडे, पोलीस आयुक्त महादेव तांबडे यांचीही भाषणे झाली.
पालकमंत्री देशमुख यांनी रिमोट कंट्रोलच्या सहाय्याने ई - भूमीपूजन आणि ई - लोकार्पण केले. यावेळी महानगरपालिकेच्या विविध समित्यांचे सभापती, नगरसेवक आणि सोलापूरचे नागरिक उपस्थित होते.
प्रास्ताविक आयुक्त अविनाश ढाकणे यांनी केले तर आभार संचालक रामचंद्र पाटील मानले.
******
No comments:
Post a Comment