सोलापूर, दि. २८- सोलापूर जिल्ह्यातील बहुतांश तालुक्यात पाऊस पन्नास टक्के पेक्षा कमी झाल्यामुळे जिल्हा प्रशासन आणि जिल्हा परिषद यांनी एकत्र येऊन टंचाई कृती आराखडा तयार करावा, अशा सूचना विभागीय आयुक्त डॉ. दीपक म्हैसेकर यांनी आज दिल्या.
विभागीय आयुक्त डॉ. म्हैसेकर यांनी आज जिल्हाधिकारी कार्यालयात विविध विषयांवर आढावा बैठक घेतली. त्यावेळी त्यांनी या सूचना दिल्या.
बहुद्देशीय सभागृहात झालेल्या या बैठकीस जिल्हाधिकारी डॉ राजेंद्र भोसले, मुख्य कार्यकारी अधिकारी डॉ राजेंद्र भारूड, उपायुक्त प्रताप जाधव, दीपक नलवडे, अजित पवार, अतिरिक्त जिल्हाधिकारी रामचंद्र शिंदे, निवासी उपजिल्हाधिकारी संजय तेली आदी व्यासपीठावर उपस्थित होते.
विभागीय आयुक्त डॉ दीपक म्हैसेकर यांनी सांगितले की, पावसाची परिस्थिती पाहता जिल्ह्यात संभाव्य टंचाईला सामोरे जावे लागेल अशी शक्यता आहे. त्यासाठी नव्या मानकानुसार सर्व माहिती गोळा करून ती माहिती आवश्यक त्या स्वरुपात तयार करायला हवी. माहिती गोळा करण्यासाठी महसूल, कृषी विभाग आणि भूजल सर्वेक्षण यंत्रणेच्या अधिकारी यांनी एकमेकांत समन्वय ठेवावा. प्रस्ताव तयार करताना माहितीची सत्यता तपासून पहा.'
टंचाई बाबतच्या शासन निर्णयानुसार कार्यवाही करावी. त्यामध्ये दिलेल्या निकषांनुसार आराखडा तयार करताना काळजी घ्यावी, अशा सूचनाही त्यांनी दिल्या.
जिल्हाधिकारी डॉ राजेंद्र भोसले यांनी जिल्ह्यातील बार्शी वगळता सर्व तालुक्यांत पन्नास टक्के पेक्षा कमी पाऊस झाला आहे. त्यामुळे टंचाई आराखडा तयार करण्याच्या सूचना देण्यात आल्या आहेत, असे सांगितले.
बैठकीस अन्न धान्य वितरण अधिकारी श्रीमंत पाटोळे, जिल्हा पुरवठा अधिकारी रामचंद्र उगिले, उपविभागीय अधिकारी ज्योती पाटील, शमा ढोक, शिवाजी जगताप, सचिन ढोले, प्रमोद गायकवाड, मारुती बोरकर, कृषी उपसंचालक रवींद्र माने , तहसीलदार मधुसूदन बर्गे, अमोल कदम, ऋषीकेश शेळके आदी उपस्थित होते.
प्रधानमंत्री आवास योजनेची
कामे तत्काळ सुरू करा
प्रधानमंत्री आवास योजनेंतर्गत घरकुलांची कामे तत्काळ सुरू करा. त्यासाठी आवश्यक असणारी प्रशासकीय कामे पूर्ण करावी. कामे १५ आक्टोबरपर्यंत करावीत.
|
00000
No comments:
Post a Comment