स्मार्ट सिटीचा निधी शासन निकषानुसार ठेवा विभागीय आयुक्त म्हैसेकर यांच्या सूचना

सोलापूर 28 : - स्मार्ट सिटी डेव्हलपमेंट कार्पोरेशनकडील निधी शासन निकषानुसार बॅंकेकडे ठेव स्वरुपात ठेवावा, अशा सुचना पुणे विभागीय आयुक्त डॉ. दिपक म्हैसेकर यांनी दिल्या.

            स्मार्ट सिटी डेव्हलपमेंट कार्पोरेशनकडील बैठक येथील शासकीय विश्रामगृहात झाली.  बैठकीस महापौर शोभा बनशेट्टी, उपमहापौर शशीकला बतुल, जिल्हाधिकारी डॉ. राजेद्र भोसले, पोलिस आयुक्त महादेव तांबडे, महापालिका आयुक्त अविनाश ढाकणे, नगरविकास  विभागचे उपसचिव पी. सी. दशमना, महापालिका सभागृह नेते संजय कोळी, विरोधी पक्ष नेते महेश कोठे,  एम.सी. डी. एल.चे स्वतंत्र संचालक चंद्रशेखर पाटील व नरेंद्र काटीकर, कार्पोरेट सल्लागार आनंद गावडे यांच्यासह संबधीत अधिकारी उपस्थित होते.

            डॉ. म्हैसेकर म्हणाले, स्मार्ट सिटीची कामे करणाऱ्या यंत्रणामध्ये समन्वय ठेवून स्मार्ट सिटीत होणारी कामे दर्जेदार व गुणवत्ता पुर्ण व्हावीत. कामे मुदतीत पुर्ण करण्याकडे कटाक्ष असावा. महत्वाची कामे प्राधान्याने सुरु करावीत, असे त्यांनी सांगितले.

            महापालिका आयुक्त ढाकणे, यांनी सोलापूर शहरात स्मार्ट सिटी डेव्हलपमेंट कार्पोरेशनमार्फत सुरु असलेल्या कामांची  माहिती दिली. सुरवातीचा काही काळ नियोजन करण्यात गेला, आता या योजनेतील कामे शहरात गतीने सुरु होतील असे त्यांनी सांगितले. या योजनेसाठी  केंद्र सरकार, राज्य शासनकडून निधी प्राप्त होत आहे. यामध्ये महापालिका आपल्या हिश्याचा निधी कामांच्या गतीनुसार देईल. पुढील काही महिन्यात स्मार्ट सिटी डेव्हलपमेंट कार्पोरेशनकडील कामे गतीने करून पहिल्या 20 मध्ये येण्याचा प्रयत्न असल्याचे ही त्यांनी सांगितले.

00000

चंद्रभागेवरील घाट बांधणीची

       विभागीय आयुक्तांकडून पाहाणी

सोलापूर दि. 28 :- तीर्थक्षेत्र विकास आराखड्यांतर्गत पंढरपूर येथे चंद्रभागा नदी काठावर सुरु असलेल्या घाट बांधकामाची पाहणी पुणे विभागीय आयुक्त डॉ. दीपक म्हैसेकर यांनी  आज पहाणी केली.

        यावेळी जिल्हधिकारी डॉ. राजेंद्र भोसले, अतिरिक्त जिल्हाधिकारी रामचंद्र शिंदे, उपविभागीय अधिकारी सचिन ढोले, प्रमोद गायकवाड, शमा ढोक-पवार, तहसीलदार मधुसुदन बर्गे यांच्यासह संबंधित विभागाचे अधिकारी उपस्थित होते.

     तत्पूर्वी विभागीय आयुक्त डॉ. म्हैसेकर यांनी विठ्ठल रुक्मिणी मंदिरात जाऊन विठ्ठल रुक्मीणीचे दर्शन घेतले. तदनंतर आयुक्त म्हैसेकर यांनी विठ्ठल रुक्मिणी मंदिर समिती मार्फत भाविकांसाठी सुरु करण्यात येत असलेल्या उपक्रमाची माहिती घेतली. जिल्हधिकारी डॉ राजेंद्र भोसले यांच्या हस्ते पुणे विभागीय आयुक्त डॉ. म्हैसेकर यांचा सत्कार करण्यात आला.

00000