अनुसूचित जातीच्या विद्यार्थ्यांसाठी मॅट्रीकपूर्व शिष्यवृत्ती

पुणे, दि. 24 : राज्यातील इयत्ता 9 वी व 10वी मध्ये शिकणाऱ्या अनुसूचित जतीच्या विद्यार्थ्याना व विद्यार्थीनींना भारत सरकार मॅट्रीकपूर्व शिष्यवृत्ती योजना लागु करण्यात आली आहे.

            या योजने अंतर्गत शिष्यवृत्ती व इतर अनुदानाचे दर पुढील प्रमाणे आहेत. वसतिगृहात न राहणाऱ्या अनिवासी विद्यार्थ्याना शिष्यवृत्ती रु.150, पुस्तके व तदर्थ वार्षिक अनुदान रु.750 आहे. वसतिगृहात राहणाऱ्या निवासी विद्यार्थ्याना शिष्यवृत्ती रु.350 व  पुस्तके व तदर्थ वार्षिक अनुदान रु.750 आहे.

    या शिष्यवृत्तीशिवाय विनाअनुदानित शाळेतील अपंग विद्यार्थी / विद्यार्थीनिकरीता अतिरिक्त भत्ते पुढील प्रमाणे आहेत. अंध विद्यार्थ्यांसाठी मासिक भत्ता, वसतिगृहात न राहणाऱ्या अपंग  विद्यार्थ्यांकरीता वाहतुक भत्ता,  अपंग  विद्यार्थींच्या सोबत्याकरीता भत्ता, अपंग विद्यार्थ्यांच्या मदतनीसाकरीता भत्ता प्रत्येकी 160 रुपये, मंदबुध्दी  विद्यार्थींकरीता शिकवणी भत्ता 240 रुपये आहे.

            योजना ऑनलाईन असल्याने http://mahaescholmaharashtra.gov.in या पोर्टलवरुन विद्यार्थ्यांनी अर्ज भरावयाचे आहेत. अर्जासोबत पुढील कागदपत्रे जोडणे आवश्यक आहे. ऑनलाईन भरण्यात आलेल्या शिष्यवृत्ती अर्जाची प्रत (फ्रेश/ रिनिवल) , सक्षम प्राधिकाऱ्याचा विद्यार्थी / विद्यार्थ्यांनीचा जातीच्या दाखल्याची सत्यप्रत, दोन लाखाच्या आत उत्पन्न्‍ असल्यास पालक नोकरी असतील तर त्यांनी वार्षिक उत्पन्ना बाबत नियोक्त्याचे प्रमाणपत्र देणे आवश्यक आहे. माध्यमिक शाळेतील मुख्याध्यापकांनी वरील योजनेच्याबाबतीत अधिक माहितीसाठी जिल्हा समाज कल्याण अधिकारी, जिल्हा परिषद, पुणे यांच्याशी संपर्क साधावा.

000