सोलापूर दि.30 :-अवयवदान हे मोठे सामाजिक काम असून प्रत्येक गरजू रुग्णांना अवयव मिळाला पाहिजे. अवयवदात्याची गरज असलेले मोठ्या प्रमाणात रुग्ण असून प्रत्येकाने अवयवदान करावे,असे आवाहन मनपा आयुक्त विजय काळम-पाटील यांनी करुन स्वत:सपत्नीक अवयवदानाचा संकल्प केला.
आज सिव्हिल येथे आयोजित महाअवयवदान अभियानाच्या शुभारंभ प्रसंगी ते बोलत होते. या कार्यक्रमाला महापौर प्रा. सुशिला आबुटे , सोलापूर विद्यापीठाचे कुलगुरू डॉ. एन.एन. मालदार , जिल्हा परिषदेचे अतिरिक्त मुख्य कार्यकारी अधिकारी पोपट बनसोडे , व्ही.एम. मेडीकल वैद्यकीय अधिष्ठता डॉ. राजाराम पोवार , डॉ. माधवी रायते, जि.प. आरोग्य अधिकारी डॉ. शितलकुमार जाधव , जिल्हा शल्यचिकीत्स्क डॉ. मल्लिकार्जून पट्टणशेट्टी उपस्थित होते.
श्री. पाटील म्हणाले की किडनी , त्वचा , डोळे , यकृत , फुफूस या सारखे अवयव आपण दान करू शकतो.आपण सर्वांनी आजच्या दिवशी अवयवदानाचा संकल्प करून अर्ज भरावा असे आवाहन करून स्वत्:चा व पत्नीचा अवयवदान संदर्भातील अर्ज भरून दिला. तर कुलगुरू डॉ . मालदार म्हणाले की अवयवदानाचे महत्व घराघरात पोहचले पाहिजे . आज देशात अवयवदानाच्या प्रतिक्षेत हजारो रूग्ण आहेत त्यांना जर अवयव मिळाले तर त्यांचे आयुष्य सुंदर होईल. अवयवदान करून आपण अनेकांना जीवनदान देऊ शकतो.
वैद्यकीय अधिष्ठता श्री. पोवार यांनी प्रास्ताविकातून या अवयवदान मोहिमेची संकल्पना विषद केली तसेच हे अभियान दि. 30 ऑगस्ट ते 1 सप्टेंबर या कालावधीत राबविण्यात येणार असल्याचे सांगितले. या महाअवयदान अभियानाच्या शुभारंभ प्रसंगी रॅलीचे आयोजन करण्यात आले होते या रॅलीला महापौर श्रीमती आबुटे यांनी झेंडा दाखवून शुभारंभ केला या रॅलीत अवयवदानाचे महत्व सांगणारे शेकडो फलक घेवून वैद्यकीय महाविद्यालयाचे विद्यार्थी , डॉक्टर्स , विविध स्वयंसेवी संस्था त्याचबरोबर मनपा व जिल्हा परिषदेचे आरोग्य विभाग , नागरिक हजारोंच्या संख्येने सामील झाले होते.
ही रॅली सिव्हील हॉस्पिटल येथून निघून नॉर्थकोट प्रशालेच्या मैदानावर त्याचा समारोप झाला यावेळी सहाय्यक पोलीस आयुक्त महेश जोशी , सामाजिक कार्यकर्त्या सीमा कीनीकर , मनपा आरोग्य अधिकारी जयंती आडके , चंदूभाई देढीया, सर्जरी विभागाच्या प्रमुख श्रीमती डॉ. वरूडकर यांच्या सह इतर मान्यवर उपस्थित होते.
No comments:
Post a Comment